القلب ممكن يحب اكتر من مره

زائر الإثنين مايو 26, 2008 2:22 pm

هل ممكن ان تحب اكتر من مره صعب اوي ولكن ممكن ونحاول نسمع اراء

يقال ( تمام التمام بس تنكروا إنه بيحصل وبتلاقيك -أو بتلاقيكِ- بتحب اتنين وتبدأ الآهات والدموع وعدم الاستقرار وتبدأ أغنية "محتار اختار مين فيهم هما الاتنين عاجبني"!

ويبدأ السهر ويبدأ القلق بس اللي إنت أو إنتِ ماتعرفيهوش واللي ممكن يطمنكم إنه آه ممكن الواحد يعرف اتنين، يعجب باتنين، ده ممكن كمان يتجوز اتنين، لكن يحب اتنين.. لأ.. أهو ده اللي مش ممكن أبدا، ليه بقى؟

ليه ده بيحصل؟ أقول لكم أنا
لكذا سبب.. تحبوا تعرفوهم...؟!

-1-

إن الواحد يعجب بصفة أو شوية صفات في كل واحد من اللي متخيل إنه بيحبهم وهاقولكم ليه متخيل لأنه لو لقى الصفات اللي بيحبها في الاتنين دول في شخص واحد هيحبه بس ويسيب اللي متخيل إنه بيحبهم وده أكبر دليل على إنه في الحقيقة مابيحبهمش.

-2-

ممكن يكون بتحب الحب نفسه والشعور إنَك -أو إنِك- تكون محبوب ولمضاعفة شعورك ده بتحصل عليه من شخصين مختلفين.

-3-

إنك تكون مش ناضج عاطفيا كفاية علشان تقول إنك بتحب شخص بعينه فاللي بيحصل إنك بتمشي في الشارع تحب أي حد موجود والسلام.

-4-

فيه كمان ناس معقدة تحب تحس بأهميتها وإنهم مقطعين السمكة وديلها وبيعملوا أي حاجة علشان يكتسبوا الصفة دي وده طبعا مش حب.

طيب والعمل إيه؟..
أكيد مش هنسيبكم كده من غير حل ...

لو الحالة -1- هي حالتك..
فالحل يبقى البعد عن الاتنين وقعدة محترمة مع نفسك وتفكر أنهي شخص بتحبه وعايز -أو عايزة- تقضي معاه بقية حياتك وده يتم بمنتهى العقل والموضوعية ولو ماقدرتش توصل لأي نتيجة يبقى لازم تعرف إنك لازم تبعد عنهم هما الاتنين لأنك مابتحبش لا ده ولا دي.

أما لو حالتك -2- بقى..
فلا بديل عن التأمل ومراجعة الأفكار والمشاعر وتستنى ماتستعجلش.. شوف المتاعب اللي بيقابلها الناس اللي بيقعوا في الحب بسهولة، ماتستعجلش وثق إن الحب الحقيقي هييجي لغاية عندك.

لكن لو الحالة -3-
فيبقى لازم تملا أوقات فراغك لأن غالبا ده اللي بيخليك تعمل كده وكمان لازم تحدد لك هدف واضح في الحياة وتتصالح مع نفسك وتشوف إيه اللي مخلي ده حالك وتحله.

بصراحة الحالة -4- دي بالذات
يلزمها نوع من أنواع العلاج النفسي علشان تقدر تتحكم في مشاعرها أكتر من غير ما تؤذي اللي حواليها.

القلب ممكن يحب اكتر من مره Summervs9